Heb 9 | BEF | STEP | Lu mu tifise'namofihi ka'a tafa'agu Sipi Bomofihi bulo lipi emilata nehana lu laga huse kaga ni'ina to mono nohi metoga mino'ehina.

Hebrews 9

Kokulumalugu mono nohi yabe

1 Lu mu tifise'namofihi ka'a tafa'agu Sipi Bomofihi bulo lipi emilata nehana lu laga huse kaga ni'ina to mono nohi metoga mino'ehina. 2 Yamofihi mono'mofihi go nohi ya'ma ya hite gi'ahana. Hasa mone fi laga hi'ahana mone okaba'aga mino'ehinamofihi gi'a sipi bebe sose'i yabe lite li'ahana. Anagu ya'ma libi'mo yatamalo to hita gigusa'a hiti mino'ehina to hisamofihi gupisa'alo ya'ma Hu'mamofihi bulo mele'ahana beleti nose'na lapelugu mino'ehina. 3 To buto komopa'agu mone kesige katatu fi laga hago mino'ehina gi'a bebe sosemofihi legeya'a eto huse'i yabe lite mino'ehina. 4 Anagu ya'ma tu'a hiti nasanamofihi lokiya fi emilata hita mone golitu lolo hi'ahana ya'ma mino'ehina. To bokisi golitu lolo hi ete'ahana ya'ma lu mu tifise'namofihi kaga'a ni'ina. Ya'ma bokisi anagu mana nose'na kokulumaguti limi'ehina nose'na mone'a somogu mino'ehina. Ana somomo golitu lolo hi'ahana anagu ya'ma mana nose'na mino'ehina. Ana bokisigu Alonihi fatusa bu'a hiti fi ho tilago mino'ehina. To lapelegusa efahi loemo ya'ma keya ka analo fayahi keye malago mino'ehina. 5 Ifo'alo ya'ma Hu'mamofihi fana mehena'amofihi babeyafa'alo kene'i loemale'i etali foipana okala hu epololata hitalo ya'ma koke'na'atititu lite ifi telete mine'aha'ina. Yamofihi ka'a yatama hu lalibe luto asaga'na ana'ina'mu molo emito lu su mehaluna'mu yabe.

6 Ana'ina ya suhi hite lolo hite mele'ahago ni'igo nohi buga'aga anagu tite ya'ma mamufa gi emilata bona'i enali kana'amu kana'amu tite foya'ani lite minelata hi'ahana. 7 Nohi komopa'a monelugu ya'ma mamufa gilata bona'magihi sipi bo'ani ai'ago kufu mone'amofihi yupahi nohi komopa'agu tito mino'ehina. Ya huloto meme yagamagihi bulumaka yagamagihi golahi li hekigo ligo tito yata'a ai'a foipana'a hiti to alihi bona'magihi foipana sibigopa mino'ehina li'ahanamofihi mekeheli'ahana yana'mu yabe luto hitalo ana golahi fepa kopa i'ehina. 8 Ana'ina yanamofihi hapa'a ya'ma fana meha'a hiti Sikalafu'uba ma luto lu nolimibe: Nohi hasa luga'a ya'ma fa'mene ni'inogo bebe sose mono nonugu buto fololata nohuta kapo hokolo hu su meho'ehinamo ni'ibe. 9 To ya'ma hasamofihi okaba'aga mino'ehina ya'ma kanalo metoga nominota'a nasana babeyafa'a huto ni'ibe. Yamofihi hapa'a kehelilotiti ya'ma bebe sose mono nonugu gomolu nose'na kuguhi keyete laita hilata nehana yanauba Hu'mamofihi bulo lipi emilata nehanamagihi komopa'ani le'mo fotogo mehilibe luto nokehelune. 10 Yanauba enugufa'aga li molo'ehina ka'ago ya'ma ni'ibe. Lu laga huse kagamu'i nose'na fato fato'i to bai nagami'i nenanaya to enugufa'ani mono nagami'i okala hilata nehana yamofihi kaga'a ni'ibe. Ya'ma Hu'mamofihi ka'alo huto higo bona'magi mege'i melete bite nehinogo aliha'a Kilisitou ana'ina le'mo bebe salina kana'a huto hilibe.

11 Ya hu'ehinaya Kilisitou ai'a ya'ma ana'ina legeya'a li huto huto lu molo'ehina yamofihi mamufa gilata nehana bona'i sipi mono bo'ani huto hu'ehina. To Kilisitou ya'ma kokulumagu mono nonugu lili'na lito mino'ehinauba tafa go nohi be ligi'ehina to ya'ma ifo'alo mono nohi mone legeya'a lamana'a enayatu megi'ahana to ma metoga meni'inamofihi babeyafalo ni'inaya mino'ehinamo ni'ibe. 12 Kilisitou ya'ma meme yaga bulumaka yagamagihi golapo li'ehina ni'igopa ai'a golaha'a hiti buto bebe sose go nonugu tito ya'ma nohi hasagu tilina kana moneko'i tito mina fi letoto lubuto bito mino kosaba huse'i limi'ehina yamofihi minomo buto minaluta'mu yabe. 13 To mememagihi bulumakamagihi golahi to bulumaka ikele'amofihi gufalo logouba lo'ehina lahi folo epalalina nasana'mu bonatoga fepa fepa iloto enugufaga folo epalago bi fele afele tigo mine'ahana enali Hu'mamofihi bulo enele'mo bati hi'ahana. 14 Ya hu'ehinaya Kilisitou ai ya'ma minoba minoba Meha'auba fi hele hu etago ai komopa'a hiti gufa'a hiti bati huto mino'ehina yamofihi Hu'mamofitoga hetofa mamufa gi emi'ehina. Ya hu'ehina'mu Kilisitohi golaha'auba komopatilo i kolo'ehinamofihi okala huto foipa foya he'mi letoto lele'mo bebe solenogo mino kosaba huse bo, Hu'ma aitoga agoya hu emito foya'a lilata nohune.

15 Ya hu'ehina'mu Kilisitou ai'a ya huloto lu mu tifisemofihi ka'a tafa'a yanagu bona'i mine'ahana foipana li huto hi'ahana yaguti li kele li letalube luto fili'ehinamo ni'ibe. Ya hu'ehina'mu bona'i yata'a lu mu tifise'na kagalugu mine'ahana Kilisitou foipanaguti gulu ho epolo'ehina yabe, luto fili'ehina. To nofilito Hu'mau elesa molo epi'ehina bona'i enali minoba minoba husemofihi kokulumagu yogo fe'nohi lilabe luto lusa gi epalalina'mu yabe. Ya'ma bati hite lilabe luto Hu'ma hiti bona'i hiti enele'mo hepiloto lu mu tifise ka'a kosaba'i li huto huto molo leto'ehinamo ni'ibe.

16 Yogo fe'nopofihi kapo'a ma huto ni'ibe. Afo'afu fili'ehinamofihi hapa'a huto lu yege holenogo yogo fe'nopofihi ka'auba legeya'a henilina'mu yabe. 17 Ana bona'i kosaba'i bu hiti nohinogo yogo fe'noho nasanamofihi ka'a ya'ma fa'menego minalina'mu yabe. Fililenogo yamofihi legeya'a huto hilina'mu yabe. 18 Ya hu'ehina'mu ya'ma lu mu tifisemofihi ka'a tafanauba yagamagihi golahi he nekigo bu molo'ehinago bati huto mino'ehinamo ni'ibe. 19 Yata'a Moseu keya kamofihi fayahi koyo'ehina asaga kaga lataha'asiloko leka soto lu yege hoto bona'i lu epigo keheli'ahana. To lu epi su holoto bulumaka ikele'amagihi golahi to mono nagami'i hiti li sibi sibi huto segi osahi mone tupa'alo to sipisipi yagamagihi oka'ani safa'na moloto sa giloto yamofitu nagami iloto lepe tepe huto keya ka ni'inalo to silaga boana'i nehanalo folo epolo'ehina. 20 Ya huto'a ma luto lu epilata hu'ehina:Hu'mau lu mu tifise'namofihi ka'a lu laga hu lepolo'ehina yamofihi golaha'auba lenele'mo bati hinogo lama'nakagalo kehelite mege'i malalo, luto ligo kehelite mine'ahana yabe. 21 To Moseu ya'ma bebe sose go nohi ni'ina to anagu foyamofihi nasana asaga'i ni'ina yalo ya'ma golaha'a fepa kopa ito su ho'ehina. 22 Ya hu'ehina'mu ya'ma keya ka lu'ehina ka'alo ana'ina silagaloga mememagihi bulumakamagihi golaha'anitu okala hulata nohinamo ni'ibe. Golahi memalalana'a ni'inogo ya'ma bona'magihi foipana'ani li kele lilata'a mone meni'ibe.

Kilisitohi golaha'auba foipanati kele lilata nohina

23 Ma metoga mono nasana silaga'namofihi hapa'a ya kokulumagu ni'inamofihi babeyafa'a fa'menena golaha'atu nagami ite nokala hite li gulu gulu lilabe luto keya ka ya lu'ehinamo ni'ibe. To kokulumagu nasana lamana'auba ai'a ya'ma lokiya fi emilata nasana eto huto mino'ehina yanauba nagami ito hapa'a hetofana lolo hilibe luto le'mo hokolo hilinamofihi kapo'a moneko'isi ni'ibe. 24 Ya hu'ehina'mu Kilisitou ai bona'magihi enayatu gi'ahana mono nonugu to lamana'amofihi babeyafa'a mino'ehina anagu buto meti'ehibe. Ai kokulumagu tiloto Hu'mamofihi bulo lali kumu yabe luto nehetito lele'mo hetofa hilina foya'a ya'ma lilata nohibe. 25 To Yuta bona'magihi sipi mamufa gilata bouba kufu'amu kufu'amu hetofa kana'a moneko yupasigo bebe sose nonugu tito meme yaga mone'mofihi golahi lito tilata nohibe. Ya nohuto ai'a golaha'atugopa fa'mene nasanamofihi golaha'a liloto tilata hu'ehinaya Kilisitou ai'a gufa'a komopa'a ya'ma lali kumu yabe luto he'milube'mu kana babu yupahi meti'ehina ni'ibe. 26 Yana'mu Kilisitou ai gufa'a komopa'a kana'amu kana'amu he'mi leto'ehina ni'itita ai me'mofihi lolo hu'ehina kana'a huto hu'ehinaloti ema'aga keke'i luse'i lito filito buba buba huto nesi'a meminotita'mu yabe. Ai'a ya'ma ya suhi hu emito Hu'mau molo'ehina kana'a su halube'mu nohinogo kana'a moneko'i ai'a gufa'a komopa'a nehe'mito foipanati su halibe luto huto hu'ehinamo ya'ma su ho lamana hibe. 27 Silaga bona'magita kana'a moneko'i fililune luto to yanamofihi ifo'alo Hu'mau nohinalo ai'a foipanati'mu ka foya lilube luto lu leto'ehinamo ni'ibe. 28 Kilisitou ai ana huto kana moneko'i silaga bona'magihi foipana'ani ai gupisalo tigo he'mu kito Hu'mamofihi kuguhi koyo emiloto fili'ehina. Aku'i foipa nasana li su halibe luto ni'igopa aimofihi geba hite fifa ite minelata nehana bona'i Kilisitou enubuto bise foya aliha'a li su haluna'mu yabe luto aku'i kokulumaluguti limito huto hilube'mu hibe.